وشتى في هذا المكان وذبح ذبيح، يا الله أُقدّم لك السّلام | الدحيح

أيوة يا حبيبتي، وPlease، خلّينا نشوفك. Ok؟ Bye Bye. ثانية واحدة!

إيه اللي انتي قلتيه دا يا أمي؟ كنت بأقولّها: "أرجوكي، خلّينا نشوفك. " لا يا أمي، أنا سمعتك بتقولي: Please. لا والله يا حبيبي، I swear.

يا أمي، انتي عايزة تفضحينا؟! ما عادش حد بيتكلم إنجليزي دلوقتي خلاص. بس يا حبيبي، احنا متعودين من زمان إن احنا بنقول: Thanks وMerci وI Make Toilet.

دا زمان يا أمي. زمان. أيام غياب الوعي، والانسحاق للغرب.

لكن دلوقتي. . .

دلوقتي احنا عندنا هوية قوية. ليه نتخلّى عنها؟ معلش يا حبيبي، أنا Old Fashion، أهلي ما كانش معاهم فلوس يدخّلوني مدارس National، زي ما دخّلناك. اسمها مدارس أميرية يا أمي.

ما أنا كبرت على موضوع المدارس دا بقى يا "بودي"! إلا صحيح، قولّي، انت بتطور الـArabic بتاعك ازاي؟ يعني، حاولي تتفرجي على أفلام عربي كتير مثلًا. بس أنا معظم الكلام مش بأفهمه.

يعني، تقدري تشوفيها بترجمة عربي، تسمعي أغاني عربي، تشوفي الكلمات. بُص، أنا مش عايزة أعملّك Shock، بس أنا أصلًا مش بأعرف أقرا عربي. معقول؟!

يعني بتقري إنجليزي، وما بتعرفيش تقري عربي؟! ولا English وحياتك! أمك بصمجية يا حبيب أمك!

بُصي يا أمي، الموضوع سهل، امسكي هاتف الياء بتاعك. قصدك الـIPhone؟ هو دا يا ستي! هتُخشّي على تطبيق "علّمني لغتي العربية لأني مفتقدة الهوية.

" Really؟ دا اسمه بجد؟! أيوة يا والدتي، ما تركزي معايا. طب وهل الـApp دا بيشتغل على الـLap؟ ركّزي بس!

طب ممكن أشغّله على الـTab، ولّا لازم Lap؟ Oh, My God! انت قُلت إيه يا مُنسحِق؟! "مي جاد".

"مي جاد"، واحدة شاطرة عندنا في المدرسة، بنحلف بشطارتها. أنا مُنسحِق! أنا تحولت لأسوأ كوابيسي!

أعزائي المشاهدين، السلام عليكم ورحمة الله وبركاته، أهلًا بكم في حلقة جديدة، من برنامج "الدحّيح"! في القرن الـ19، ومع زيادة أعمال الاستكشاف في منطقة الجزيرة العربية، العلماء اكتشفوا بعض النقوش الأثرية، النقوش دي كانت مجموعة من الحروف مكتوبة على أحجار وقبور، في منطقة شبه الجزيرة و"الشام"، وبيرجع تاريخ هذه النقوش لقرنين، الرابع والسادس قبل الميلاد، يعني قبل الإسلام بـ10 قرون كاملةً، وبعض النقوش تاريخها أقدم وبيرجع للقرن العاشر قبل الميلاد، نقوش بالشكل اللي قُدّامك دا. "(أبو حميد)، معلش، إيه النقوش دي؟!

أنا مش فاهم أي حاجة! دي هيروغليفي؟! ولّا دي (للذكرى الهباب وأيام العذاب) بتاعتهم؟!

" إيه؟! عزيزي، المصريين القدماء ما عاشوش على شبه الجزيرة العربية، فتخمينك وهزارك ما لهومش أي معنى! خلّينا، يا عزيزي، نترجم النقوش دي سوا ونشوف.

عندك النقش دا مثلًا، بنسميه "نقش صفوي"، دا موجود في شمال الجزيرة، بيتقري من الشمال لليمين، لمّا ترجمه المستشرق الألماني "إينو ليتمان" لقاه، يا عزيزي، بيقول: "لـ(برد بن أصلح بن أبجر)" ودا يا إما اسم الراجل اللي كتب النقش، أو متوجه للراجل اللي اتكتبله النقش، أو عمل سُفلي! "ليتمان" قرا كمان في النقش: بصراحة، يا عزيزي، أنا حاسس إن الكلام صح، بس كل حاجة لوحدها، الترجمة تبدو عربي فعلًا، واحد اسمه "برد بن أصلح" ذبح ذبيحة في المكان دا، لكن المحير إن النَّص هنا شكله مش عربي خالص، لا دي الحروف بتاعتنا، ولا دا الخط بتاعنا! الحقيقة إن دا لم يكن النقش الوحيد اللي بالشكل دا، فيه نقوش كتير بتحكي عن عرب، زي "برد" دا، نقوش عمرها قرون قبل الإسلام، لكنها برضه، زي ما وريتلك كدا، مكتوبة برموز مختلفة.

دا، يا عزيزي، حطّنا قُدّام سؤال لا مفر منه، هل هناك لغات تانية اتكلمها وكتب بيها العرب زمان قبل العربي بتاعنا؟ على حسب عمر النقوش، اللي قُلتهولك دا بينتمي لحقبة سبقت الإسلام و"القرآن"، سبقت حتى شِعر المُعلَّقات، اللي اتكتبت آه بلُغة صعبة، ولكن بنفس الخط بتاعنا والحروف بتاعتنا. "طب حلو يا (أبو حميد)، احنا نبص بصة على المصادر، ونرجع لهذه الحقبة، ونشوف كانوا بيتكلموا ويكتبوا ازاي فيها. مش النقوش دي تُعتبَر مصادر؟" - يا عزيزي، ممكن تتريث؟ - "إيه؟!

" - تريث. - "حاضر". للأسف، يا عزيزي، اللي انت بتقوله دا صعب جدًا!

لوقت طويل، اتفق أغلبية علماء اللغة إن أقدم النصوص اللي وصلتلنا مكتوبة بالعربية، هي المُعلّقات، وبعدها، "القرآن الكريم". الباحثين الأجانب اعتبروا لحد القرن الـ19 إن المصدرين دُول هما الأفق اللغوي، أو المساحة اللي نقدر ندوّر فيها لو عايزين نلاقي أقدم شكل مكتوب للعربية. ليه؟ لأنهم اعتبروا قبل كدا إن الجزيرة العربية كانت صحرا فاضية، سكانها ناس أميين ومعزولين عن العالم، تاريخهم شفهي، صعب يسيبولنا حاجة مكتوبة.

"(أبو حميد)، ما تآخذنيش، يعني هو، بذمتك، ما فيش عالم كدا ولّا كدا حب يدعبس قبل المُعلّقات و(القرآن)، ويشوف، هل كان فيه لغات تانية للعرب ولّا لأ؟ هه؟! " الحقيقة، يا عزيزي، ما فيش حد ببساطة احتاج إنه يفكر في كدا، معظم علماء اللغة القدامى اعتبروا إن "القرآن" والمُعلّقات نصوص مكتوبة قُدّامنا بأقدم شكل ممكن للعربي، "فليه بقى احنا ندوّر على أشكال تانية؟! ما خلاص!

" خصوصًا إنهم ما كانوش علماء آثار يعني. ولا عارفين ولا كانوا متوقعين إن فيه نقوش هتطلع وتحط هذا السؤال قُدّام عينينا. فبما إن النص العربي موجود بحروفه وبخطوطه وبكلماته، فالسؤال اللي كان شاغلهم أكتر هو النُطق، وتحديدًا، لو كانت دي اللغة اللي موجودة عند العرب من قديم الزمان، فمين أول واحد قالها؟ ومين أول واحد نطق العربية اللي بنقراها في المُعلّقات و"القرآن"؟ بما إن هذه، يا عزيزي، معلومة ليس لها توثيق مكتوب، وبما إن ما لهاش مَصادر، فالعلماء القدامى هيحاولوا يجاوبوا على دا بتخمينات، تخمينات جاية من المصادر الدينية.

عندنا مثلًا، "الحافظ بن كثير" اللي هيقول في كتابه "البداية والنهاية"، إن "آدم"، عليه السلام، هو أول شخص في التاريخ اتكلم بالعربية الفصحى، ولكنه رجع بعد كدا يوضّح ويقول، إن فيه روايات بترجّح إن الشخص دا، أول واحد يتكلم باللغة العربية الفصحى كان "نوح" عليه السلام. وفي رواية تانية بتقول إنه "هود"، عليه السلام، أو أبوه. "(أبو حميد)، معلش، ممكن تقول اسمه؟" مش سهل انت برضه، يا عزيزي!

بسم الله الرحمن الرحيم، أنا قعدت، يا عزيزي، 3 أيام أحفظ "سام بن نوح"! وفي النهاية، بيختم "ابن كثير" حيرته الواضحة زي ما انت شايف كدا، بقول: "الله أعلم. " في مرحلة تانية، يا عزيزي، بييجي واحد تاني، "شمس الدين القرطبي"، في كتابه "التفسير الكبير"، بيقول إن "جبريل"، عليه السلام، هو أول واحد اتكلم باللسان العربي، ولكن لأنه من الملائكة، فكان لازم يلقيه على بني "آدم"، فألقى ما يحمله من العربية للنبي "نوح".

"القرطبي" بيطرح تفسير تاني بحديث شريف بيقول: وفي رواية أخرى، "ابنُ أرْبَعَ عَشْرَةَ سَنَةً". كمان، بيظهر عند "القرطبي" اسم "يَعرُب بن قحطان" باعتباره أول من نطق العربية، وبعض الروايات بترجّح إن لفظ "العرب" جاية منه، وبالتالي، هو ممكن يكون فعلًا أول واحد يتكلم عربي. لو لاحظت، يا عزيزي، من الأمثلة السابقة، هتلاقي علماء اللغة بيحاولوا يوصلوا لنتيجة أقرب للتخمين، دي، يا عزيزي، معلومة مش مصدرها موثوق، وأطرافها بيتخانقوا على مصداقيتها، دي مساحة واسعة من التخمين والاجتهاد، مساحة بيستعيروا أفكارهم فيها من محاولات تفسير النصوص المقدسة سواء بقى "القرآن" أو السُنّة أو روايات مُعنعَنة تخص أصحابها.

دا ما يمنعش إن يكون هناك محاولات علمية بشكل أكبر، زي "ابن جنِّي"، اللي هو تقريبًا صاحب أول محاولة للبحث فيما سمّاه علماء اللغة في العصر الحديث "ابن جنّي"، أو "أبو الفتح عثمان بن جنّي الموصلي" عاش في "بغداد" في القرن الرابع هجريًا، وعرض في كتابه "الخصائص" 3 نظريات لنشأة اللغة العربية، أولها، يا عزيزي، هو "الإلهام" أو "التوقيف". دا يعني إيه؟ الكلام دا بيعني إن اللغة وحي نزل من السما على الإنسان. دي، يا عزيزي، ليست فرضية جديدة، فرضية لسة قايلها "ابن كثير" و"القرطبي"، وكتير سبقوهم ودلّلوا عنها بآية: واللي تفسيرها، على حسب العلماء دُول، بيخلّي "آدم"، عليه السلام، هو أول مَن تحدث اللغة العربية.

اللي يُحسَب، يا عزيزي، لـ"ابن جنّي" إنه لم يكتفِ بالتأويل الديني فقط، وحاول يلاقي مبررات علمية لكلامه، زي نظريته التانية، اللي هي "المُواضَعة"، ودي معناها، على حسب "ابن جنّي"، إن العرب لمّا شافوا الحيوان، اللي هيبقى في المستقبل اسمه "الكلب"، سمّوه "كلب". يعني هما، يا عزيزي، كانوا قاعدين في أمان الله، لقوا كائن بـ4 رجول، بيعدّي قُدّامهم بيقول: "هَوْ هَوْ" ما عندهومش لسة في اللغة اسم معيّن يسموه بيه، مرة في التانية في التالتة، كائن معدّي. .

. "كلب! " لزقت فيه.

دا، يا عزيزي، بالبلدي تعريف المُواضَعة. دا، يا عزيزي، بيُسمّى بـ"التعريف الاجتماعي للغة"، التعريف الاجتماعي للغة هو: نفس اللي أنا شارحهولك بالهجايص دا! دي، يا عزيزي، نظرية مقبولة جدًا على المستوى العقلي، بس برضه، ما فيهاش خصوصية على مستوى اللغة العربية، دي، يا عزيزي، نظرية تنفع مع كل اللغات، Ah.

. . Dog!

Ah. . .

Chien! وهكذا، وهكذا. أمّا، يا عزيزي، آخر نظرية لـ"ابن جنّي" فهي "التقليد والمحاكاة"، واللي بيقول فيها إن أصل اللغة العربية مُستنبَط بشكل ما من أصوات البيئة اللي نشأت فيها، أصوات الطبيعة، زي صوت الريح مثلًا، والرعد وخرير الماء، وأصوات الحيوانات، زي نعيق الغراب.

فمثلًا الريح. . .

الغراب مثلًا. . .

تحسّه بينعّق! الماء. .

. خرير الماء. .

. - "(أبو حميد)، معلش، عندي نقد. " - انت بتنقد "ابن جنّي"؟!

"لأ، ما أقصدش! بس قصدي إن دي نظرية تصلح لتفسير كل اللغات. " تاني برضه، يا عزيزي، كلامك صح، "ابن جنّي" مش بالضرورة جاب التايهة، لكنه فكر بشكل علمي.

نظرياته دي فتحت الباب لعلماء اللغة من بعده إنهم ما يهملوش التفسير الاجتماعي والمنطقي لنشأة اللغات، وإنهم يشوفوا أكتر من نظرية، عشان يقدروا يفسروا، ويشوفوا أكتر من عوامل، عشان يقدروا يفسروا. "ابن جنّي" كان بيشتغل على أد علومه وعلى أد أدوات زمانه. وفي النهاية، الخلاف مش على الحروف ولا على شكل اللغة العربية، وإنما على أول واحد نطقها.

بصراحة، يا عزيزي، الخلاف اللي حكيتهولك دا كله خلاف على معلومة فرعية، وليست أساسية، معلومة بسيطة ما بتقربش لأي ثوابت. إنما بقى لو رجعنا للنقوش اللي وريتهالك في الأول، فالنقوش دي جابت لكل عالم شافها Error! هنا الأسئلة المهمة!

ببساطة، يا عزيزي، احنا كعلماء لغة قدامى، وحتى كعلماء لغة ولسانيات حديثة، كنا نايمين امبارح ومقتنعين إن أقدم تأريخ لظهور الكتابة العربية في أقرب صورة لشكلها الحالي هو القرن الرابع الميلادي. ازاي فجأة التاريخ يخش عليا كدا، من غير لا إحم ولا دستور، وألاقيه جايبلي في جعبته كتابات ونقوش عمرها يسبق التاريخ اللي أنا عارفه بحوالي 8 قرون كاملة؟! وتقولّي: "النقوش دي كتبها عرب.

" مع إن شكلها يبان لغة تانية! لا هي نقوش العربي، ولا هي حروف العربي بتاعنا. "(أبو حميد)، طب افرض دي كانت متفبركة.

" - إيه؟! - "متفبركة. " - لأ، بجد؟!

- "آه. " عزيزي، أنا عايز حاستين بس يشتغلوا معايا، دي ودي، بس! "(أبو حميد)، مش دايمًا المدرسين بيقولوا: اسأل زي ما انت عايز؟" - بذمتك، عمر حد جاوبك زي ما انت عايز؟ - "لأ.

" - عمر حد سابك تسأل زي ما انت عايز؟ - "لأ. " حاستين بس. احنا، يا عزيزي، دلوقتي قُدّام مشكلة، قُدّامنا نقوش جديدة علينا، بتغيّر في السردية بتاعتنا عن أول مَن تحدث وكتب اللغة العربية، احنا، يا عزيزي، قُدّامنا نقوش، لمّا ترجمتهالك، لقينا إن أبطالها عرب، بس لا دي حروف، ولا دا خط العربي بتاعنا، فاللغة دي يا جماعة جت ازاي؟!

وهل دا معناه إن العرب اتكلموا لغة قبل العربي؟ ولو كان فيه لغة العرب بيتكلموها قبل العربي، هل احنا بنتكلم العربي الجزء الأول ولّا التاني؟ ولّا احنا بنتكلم إيه؟! وانت مين؟! "(أبو حميد)، أنا عايز المرادي أنا اللي أطمنك، وأقولّك: ما تقلقش!

احنا بني آدمين عباقرة، أذكيا، ومعانا علماء أجانب ومتخصصين، إشي لغة وآثار وإنسانيات وتاريخ، دا (كونسلتو) كامل! (ميركاتو ريال مدريد)! أكيد يا (أبو حميد) هما اللي هيحلوها ويجيبوا الزتونة.

" للأسف، يا عزيزي، هؤلاء العلماء حاولوا يجاوبوا على سؤال النقوش ويحلوا اللغز دا بأكتر طريقة غلط، هأخرج، يا عزيزي، وأرجع أقولّك إيه هي الطريقة. "ما هي غلط يا (أبو حميد)! " - ها؟ - "حاضر!

" في البداية، العلماء هيتعاملوا مع النقوش باعتبارها أبجديات، أو لغات غير عربية، فنلاقي أول حاجة اكتشفها العلماء الأجانب دُول الأبجدية الحِميَرية جنوب الجزيرة العربية، في "اليمن"، واللي بتتكتب بخط اسمه "المُسنَد"، ولقوا ذِكر ليها في "كتاب الإكليل" للجغرافي "الهمداني"، في القرن التاسع الميلادي، في كتابه، هيقوم حاطط جملة عربية وجنبها ترجمتها بالخط المُسنَد بتاع الأبجدية الحِميَرية. "الله يا (أبو حميد)! يبقى دا هو حَجَر (رشيد) اللغة العربية!

الراجل جايب جُمَل باللغة الحِميَرية، ومترجمها بالعربية. " الحقيقة، يا عزيزي، إن اللفظة الأدق هي زلطة "رشيد"! أو زلطة "الهمداني"!

احنا، يا عزيزي، عندنا أبجدية أجنبية، اسمها الحِميَرية، حسب رأي العلماء دُول، باختزال يعني، بيقولوا إن فيه لغة ليها أبجدية، بتتكتب بالطريةق دي، دا الـCorressponding بتاعها بالعربي، ودي اللي موجودة من قرون قبل العربي بتاعنا. ولكن بتتبُّع النقوش، الباحثين اتفاجئوا مفاجأة غريبة، عارف، يا عزيزي، مفاجآت السونار، لمّا تروح تكشف، وتبقى متوقع إن انت هتجيب عيّل، تلاقي 4 توائم؟! الباحثين لطموا على وشهم وقالوا: "يا ريتها جت على لغة واحدة!

" دُول لقوا عشرات النقوش لأبجديات مختلفة، في "اليمن" وفي "سوريا"، بل أحيانًا، في "مصر"، أبجديات مختلفة، كل واحدة ليها نظام، كأنها لغات مختلفة، فاهم، يا عزيزي، أنا بأقولّك إيه؟ انت فاهم، يا عزيزي، احنا قُدَام إيه دلوقتي؟ يعني، فيه ناس من 10 قرون، 1000 سنة كاملة قبل الإسلام، كتبت عن حياتها بعشرات النقوش غير العربية، لغات ما تشبهش العربي، لا في الحروف، ولا في الأشكال، أبجديات بعضها طبعًا انقرض، بدليل إننا اتفاجئنا دلوقتي لمّا لقيناها في الآثار. خلّيني أفاجأك، يا عزيزي، وأقولّك إن بعض الأبجديات دي فيه منها اللي عاصر الإسلام ولغته العربية، زي مثلًا، النص اللي لقاه الدكتور "سعيد السعيد"، نص بيرجع للقرن العاشر الميلادي، واللي، يا عزيزي، بيقول بالعربي: "غفر الله لـ(طوق بن الهيثم)، آمين. " وجنب الجملة العربي دي ترجمة لنفس الجملة بالأبجدية الحِميَرية.

خُد بالك، يا عزيزي، احنا بنتكلم في القرن العاشر الميلادي، دا، يا عزيزي، بعد الإسلام بكام قرن. ودا، يا عزيزي، دليل إن الحِميَرية، اللي احنا لقينا إنها موجودة قبل الإسلام، فضلت موجودة بعد الإسلام بفترة، قبل ما تختفي. فجأة، يا عزيزي، الجزيرة العربية اللي كانت خيالاتنا عنها قبل الإسلام، إنها صحرا فاضية، ما فيش لسان فيها غير اللغة العربية، فجأة، خريطتها بقت بالشكل اللي قُدّامك دا، تشكيلة متنوعة من اللغات واللهجات.

لو بصيت، يا عزيزي، لـ"اليمن" في الجنوب، "اليمن" اللي حضارتها بترجع للألفية التانية قبل الميلاد، هتلاقي زي اللي مكتوب كدا، أبجديات حضرمية وسبئية، نقوشها، خلّيني أقولّك، إن انت لو حللتها وقارنتها بالعربية بتاعة دلوقتي، هتلاقيها كأنك بتقارن العربي الحالي بالعبرية أو الآرامية. شربت البُن وكَلت المَندي في "اليمن"، تطلع الشمال وسط الجزيرة، هتلاقي الوضع نفسه، نقوش غير عربية، زي مثلًا الثمودي. "إيه دا؟!

أستغفر الله يا (أبو حميد)! انت بتقول إيه؟! " عزيزي، الثمودي هنا ما لهاش علاقة بثمود اللي مذكورة في "القرآن".

"الحمد لله! " دا، يا عزيزي، اسم قبيلة جنوب "مكة". كدا، يا عزيزي، العلماء أصبح عندهم مشكلة، احنا قُلنا خلاص يا جماعة، يبدو إن العرب مش طول عمرهم بيتكلموا عربي، يبدو إن فيه أبجدية تانية أو لغة تانية، اسمها الحِميَرية.

جينا نبُص على الجزيرة العربية، لقينا، إيه دا يا جماعة؟! احنا فيه حضرمية وسبئية وثمودية! وتشكيلة!

دي أسامي حلويات مولد النبي! إيه الثمودية دي؟! هنا، يا عزيزي، العلماء محتارين، مش عارفين يتصرفوا ازاي!

"طب يا (أبو حميد)، ما تخلّيش العلماء يتوتروا، خلّيهم يهدوا خالص! أنا عندي سؤال بسيط ليهم. العربي بتاعنا الجديد داهو، ظهر امتى؟" خلّيني أقولّك، يا عزيزي، إن العربي بتاعنا دا لغة معقدة.

"أيوة، يعني ظهر امتى؟" لغة معقدة. "أيوة، ظهر بقى امتى؟" لغة معقدة. لو دوّرنا مثلًا على أقدم نقوش، فممكن نقول إن اللي مكتوب فيها، شبه العربي بتاعنا، فهتلاقي نقش زي نقش قبر "امرؤ القيس بن عمرو"، "امرؤ القيس" اللي وصف نفسه في النقش اللي على قبره كمَلِك العرب كلهم، النقش دا، يا عزيزي، محفوظ في "اللوفر"، وبيرجع لسنة 328 ميلاديًا، يعني، القرن الرابع ميلادي.

فلو تحليل العلماء دُول طلع صح، هنا، معناه ببساطة إن اللغة العربية التقيلة اللي محتاجة زيها زي أي لغة في الدنيا آلاف السنين عشان تظهر وتتبلور، ظهرت بشكل سحري كدا على مسرح التاريخ في القرن الرابع ميلادي، وبشكل سحري كدا برضه، جت بمقشة، كنست كل الأبجديات واللغات اللي كنا محتارين فيها، كأنها لم تكن من قبل، ولولا النقوش الأثرية اللي اكتشفناها، ما كناش هنعرف أساسًا بوجودها. طبعًا، يا عزيزي، أنا بأتكلم بالطريقة دي، لإثارة السخرية، لأن دي حاجة مستحيلة منطقيًا، ما فيش لغات، على حد علمنا، بتظهر من عدم وتختفي من عدم، ما بينزلش فجأة كدا "كارت" تعريفات يقوم المجتمع كله متكلم عربي! فدا معناه إن الطريقة اللي اتعامل بيها العلماء فيها حاجة غلط، والغلط جاي من البداية.

تعالى نفكر مع بعض، إيه اللي يخلّي العلماء يحكموا من الأول إن النقوش اللي أنا وريتهالك في الأول خالص دي ما هياش عربي؟ "طب ما هي فعلًا يا (أبو حميد) مش عربي، أنا ما بأكتبش كدا! " هو انت الـReference؟! على حسب الباحث العربي الأمريكي في جامعة "أوهايو"، "أحمد الجلاد"، الموضوع ممكن يتحل بمَثَل بسيط.

تخيل، يا عزيزي، الناس جُم من سنة 3000 ميلادية، يعني، بعد حوالي 1000 سنة من دلوقتي، وكل اللي لقوه من آثارنا جرايد، فاحنا دلوقتي قُدّامنا ناس جاية من المستقبل، بتقرا حاجة احنا كاتبينها. خلّينا نفترض إن الناس اللي جاية من المستقبل دي عرفوا يفكوا رموز اللي مكتوب في الجرايد بتاعتنا، وفهموا معانيها، هل دا معناه إن احنا كلنا، سنة 2024، كنا بنتكلم بعض وبنكتب على الـChat، زي لغة الـ"جُرنال" كدا؟ هه؟ أكيد لأ. أنا، يا عزيزي، لو لقيت جرايد، دا مش معناه إن الطريقة اللي مكتوب بيها الجرايد دي الطريقة اللي الناس كانت بتتكلم بيها.

إن دلوقتي داخل تقول لأخوك إن أمك عاملة غدا، تقولّه: "ماما عاملة غدا. " ما بتقولّهوش: "قامت السيدة الوالدة بافتتاح حلة رُز وحلة بسلة، وعلّق السيد الوالد رئيس حزب المعارضة قائلًا: (أشعر بالحزن والخزي، لأني لم أجد لحمًا! وحياتي الشخصية خط أحمر!

)" ما حدش بيقول كدا، فاحنا بالتالي ما بنتكلمش زي ما الـ"جُرنال" بيتكلم. عايزك بقى، يا عزيزي، توسّع خيالك أكتر شوية، معلش، تخيل عالم لقى في الآثار بتاعتنا، ورقة مكتوب عليها بالـ"فرانكو"، بتقول مثلًا: أول حاجة هيقولها عالم الآثار: "إيه الـ. .

. دا؟! " تاني حاجة هيقولها إن أكيد دا مش عربي.

لا الحروف شبه العربي اللي هو لقاه في الجرايد، ولا الـGrammar واحد ولا حاجة، دي لغة مختلفة تمامًا! وإيه رقم الـ7 اللي في النُص دا؟! بيعمل إيه؟!

هيبص هنا للـ"فرانكو" زي ما انت بصّيت للنقوش دي بلظبط، بينما لو كان رجع بالزمن، كان سهل يوقّف أي حد في الشارع يقراله السطر دا بالـ"فرانكو"، ويلاقي نفسه بيسمع العربي اللي هو عارفه، عادي جدًا، بس جاي من أبجدية أو نص قُدّامه مقروء هو مش فاهمه. "الجلاد"، يا عزيزي، بيقول: "اللي مكتوب ما يقدرش يحكيلك القصة الكاملة للي منطوق. " فماذا لو النقوش اللي عاملة اللغز دي، ما هي إلا خطوط وطرُق مختلفة كتب بيها ناس بتتكلم عربي عادي جدًا؟ يعني الموضوع اختلاف خطوط، مش أكتر.

Arial, Times New Roman, Sakkal Majalla "فونتات". دا بالظبط، يا عزيزي، اللي عطّل الباحثين الأجانب لسنين، وخلّاهم مش عارفين يفهموا النقوش دي، وكمان، عطّلهم عن فهم ماضي اللغة العربية قبل الإسلام، وخلّاهم يعتبروا الأبجديات والنقوش دي مش مجرد مراحل مبكرة أو خطوط متنوعة عن العربي، إنما لغات مختلفة أصلًا. "(أبو حميد)، معلش يعني، مع كامل احترامي ليك ولـ(تشيرتك) ولجزمتك!

من أنت؟ من أنت لتنتقد هؤلاء العلماء الكبار المتخصصين في مجالاتهم؟ ازاي هيقعوا في غلطة زي دي، وخصوصًا، إن دا مجال تخصصهم؟! " أولًا، يا عزيزي، دا مش كلامي، أنا على الله، انت عارف! أنا كنت "أوبر" معرفة، وبعد الأحداث الاقتصادية الأخيرة، أصبحت توكتوك معرفة!

دا أستاذ "أحمد الجلاد"، مش أنا! ثانيًا، النقد اللي بيوُجّه ليهم إن أولًا هؤلاء الباحثين أجانب، العربي هو لغتهم التانية، وليس الـMother Tongue، لغة اتعلموها بشكل مدرسي، والتزموا بالنحو الحالي بتاعها. يعني مثلًا، لو قُلتلك: إيه الماضي من الفعل المضارع "يبني"؟ هتقول: "بنَى"، وهتبقى متخيلها بالشكل دا، ب، ن، ألف مقصورة، اللي بتترسم "ياء".

لو سألت مستشرق بقى، يا عزيزي، هيقولّك: "لأ، دي مش عربي! لازم "بنا"، آخرها ألِف ممدودة، لأن هو اتعلم قواعدها كدا. بينما كتير من العرب والقراء قالوا إنها تمشي "بنى" عادي بالألف المقصورة، لأن لغتهم ممارسة، ما اتعلموهاش بقواعد جافة.

المستشرقين لمّا جُم يحللوا النقوش القديمة دي، طبّقوا عليها الـGrammar العربي بتاع دلوقتي، "احنا اتعلمنا العربي كشوية قواعد، وجايين نطبّقها. " مش باصين للموضوع دا كلُغة خدت قرون عشان تتطور، زيها زي أي لغة في الدنيا، واتنطقت واتكتبت بطرُق كتير جدًا. مثلًا، أي نقش ما بيبدأش بألف لام التعريف، قالوا عليه إن دا مش عربي، مع إن دي طبعًا ملحوظة هامشية جدًا.

أي خط بيتكتب بغير حروف العربية اللي اتعودنا عليها، اعتبروه الباحثين فورًا مش عربي، دا طبعًا كان تعامل كارثي يودّي في داهية! عزيزي، خلّيني أدّيك مثال. "تسلم إيدك يا (أبو حميد)، لسة واخد ملحوظة!

" هو أنا بأفطّرك يا عزيزي؟! "لأ يا (أبو حميد)، بأقول مش مستاهلة يعني، احنا إخوات! " يا عزيزي، دا شغلي، مش كرم منّي!

خُد مثال. "حاضر يا (أبو حميد)! " لو جيت للغة زي المصرية القديمة، هتلاقيها بتتكب بالخط الهيروغليفي، بس المصريين مثلًا كتبوا نفس اللغة بالأبجدية القبطية.

تخيل لو جه باحث، ولقى نقش هيروغيلفي ونقش قبطي، وراح قايل: "دُول لغتين مختلفتين لشعبين مختلفين. " بينما هي، يا عزيزي، نفس اللغة، الخط بس هو اللي اتغير. رفض الباحثين لأي نقوش لا ينطبق عليها قواعد النحو والخط العربي بتاع المُعلّقات و"القرآن الكريم"، واعتبار النقوش دي لغات مختلفة، خلّاهم يستقروا إن اللغة العربية الحالية لم يتم تدوينها إلا يا دوب قبل الإسلام بقرن، ودا تفسير أصعب بكتير في تقبله منطقيًا، من فكرة أسهل، وهي إن كل النقوش اللي شُفتها دي، يا عزيزي، هي نقوش عربية، ولكنها مجرد محاولات سابقة ومراحل مهدت للعربية الحالية، ولكن بخطوط مختلفة.

على حسب "أحمد الجلاد"، يا عزيزي، الكلام دا منطقي جدًا، اللغة لا يمكن نكون بنتكلمها وبنكتبها دلوقتي، زي ما كتبها واتكلم بيها أهلها من 3000 سنة، طبيعي جدًا إنها تمر بمراحل كتير وخطوط كتير، وتتغير بألف شكل. - "(أبو حميد)، عندك! استنى دقيقة!

" - فيه إيه يا عزيزي؟! هأتجنن منك، شوفلي طريقة! ممكن، يا عزيزي، نركّز في الحلقة، ونسأل الأسئلة اللي أنا عايزك تسألها؟ "فيه يا (أبو حميد) لقطة هنا انت مفوّتها، مش منطقية!

ما كدا، أنا لو شُفت أي رموز مكتوبة، ممكن أقول بقى كدا إن دا عربي، بس مكتوب بخط مختلف. ما خلاص بقى، ما كلها زاطت! " بصراحة، يا عزيزي، الموضوع ليس بهذه العشوأة، أينعم المفروض ما نغلطش زي الباحثين الأجانب، ونستبعد النقوش بسهولة، لأنها مش بادئة بألف ولام، أو نحاكمها على قواعد نحو لسة هتظهر بعد آلاف السنين، دا مش منطقي!

ولكن برضه العربي زي ما بيتطور في الشكل والنطق، إلا إن برضه له خصائص لغوية، فمش أي حاجة هتنفع. يعني، زي ما انت ما تقدرش تلغي كل حاجة، ما تقدرش برضه تاخد كل حاجة، الخصائص دي عاملة زي الـFinger Print، الـDNA بتاع اللغة، البصمة المميزة، اللي نقدر نقول إنها بشكل أو بآخر عابرة للأزمان، الخصائص دي بتميز اللغة العربية عن كل اللغات السامية، ومهما اتكتبت بـ1000 خط، بتفضل البصمة دي موجودة. لو بصيت، يا عزيزي، للنقش دا، اللي لقاه العلماء شمال غرب "الأردن"، هتلاقيه بيقول: حتى، يا عزيزي، النص دا لو مش مكتوب برموز اللغة العربية بتاعتنا، بس لو بصيت، هتلاقي إن فيه ميزة لغوية مهمة، "فلم يعُد" نفي، يا عزيزي، للفعل بالصيغة دي مش موجود في أي لغة سامية إلا العربية.

حسب الدكتور "أحمد الجلاد"، لمّا بدأنا ندوّر على النقوش بالمعيار الجديد دا، اللي هي النقوش اللي فيها خصائص لغوية مميزة بتاعة اللغة العربية، لقيناها موجودة في نقوش خطوط زي الثمودي والحسمائية والصفائية، نقوش كلها بتتركز شمال "الحجاز" وجنوب شرق الجزيرة. "يعني دا معناه يا (أبو حميد) إن في المناطق دي عاش عرب أو أجداد عرب، ولكنهم فقط كتبوا خطوط مختلفة؟" بالظبط، يا عزيزي. ولو مش مصدّق دا لغويًا، فالأدلة التاريخية تأكد دا.

لو رُحنا للمناطق اللي فيها الخطوط دي الأقرب للغة العربية في خصائصها، هنلاقيها بتتقاطع تاريخيًا وجغرافيًا مع أقدم أثر مذكور للعرب. بالنسبة للتراث، "يَعرُب" هو من أوائل العرب، زي ما قُلتلك، ولكن بالنسبة لكتير من علماء التاريخ، فأقدم ذِكر للعرب هو "جُندُب" مَلِك عربي شارك في معركة "قرقر"، ضمن تحالف ملوك الشرق اللي كان معمول عشان يصد توسع الآشوريين، في القرن التاسع قبل الميلاد. عايز إيه دليل أحسن من كدا؟ دا أقرب وجود عربي هنا.

كمان، لو طلعنا بالزمن قُدّام قرن، في نفس المنطقة، هنلاقي آثار لمراسلات بين الحاكم المحلي مع المَلِك الآشوري "سرجون التاني"، بيقول فيها: دا، يا عزيزي، خبر عن شيخ عربي اسمه "عميلئتي"، بيجهز هجومه على قافلة جاية من مستعمرة آشورية في "الشام"، لعاصمة الآشوريين. نمشي شوية في التاريخ. .

. مد شوية، يا عزيزي، في التاريخ، عشان نلحق الحاضر! نوصل لسنة 673 قبل الميلاد، بنلاقي كلام الآشوريين عن توسعاتهم لـ"أدوماتو" أو "دومة الجندل"، في شمال الجزيرة العربية، واللي سمّوها إيه بقى، يا عزيزي؟ أقوى مدن "العرب".

ما قالّكش أقوى مدن الـPremier League! قالّك: أقوى "مدن العرب". يعني هنا، فيه أدلة كتير بتقول إن العرب سكنوا المناطق اللي لقينا فيها النقوش دي، النقوش اللي واخدة خصائص اللغة العربية المميزة ليها، وبالتالي، يا عزيزي، النقوش دي عربية، كتبها عرب، الفرق بس إن خطهم كان مختلف، واللغة بتاعتهم كانت في مرحلة بدري شوية في التاريخ، يعني دُول، يا عزيزي، عرب لغةً وكتابةً وثقافةً.

لو بصيت على منطقة زي "الحَرّة"، هتلاقي عشرات الآلاف من الأحجار لنقوش بالخط الصفائي، اللي بيعبّر عن أبجدية من 28 حرف، شبه العربي، واحد من الأحجار دي اتكتب عليه: بمعنى إن واحد اسمه "جرم" خيّم في المنطقة دي. بعد شوية، بنلاقي حَجَر اتكتب عليه، يعني، شخص جه وقرا الحَجَر الأولاني، ووقف على أطلال خيمة "جرم" دا، ونقش دا وذَكَره، فيه Meta، يعني "جرم" نَقَش نقش، ودا عمل علامتين صح قصاده. Seen.

المشهد دا، يا عزيزي، بيفكرك بحاجة؟ "بيفكرني يا (أبو حميد) بحصة العربي، في آخرها بأبقى بأتاوب! " لأ، مش قصدي كدا، يا عزيزي! المشهد دا، يا عزيزي، مش بيفكرك بالشاعر الجاهلي اللي بيقف على الأطلال ويبكي على اللي سبقوه؟ فاكر المنظر دا؟ ولّا مش فاكره؟ ما هي، يا عزيزي، هواية الشاعر المفضلة؟ هه؟ البكاء على الأطلال، ومناجاة الصاحبين، والـPaddle!

الشعر الجاهلي هيظهر بعد قرون من المشهد دا، هيظهر في القرن السادس الميلادي، ودا دليل على إن النقوش دي مش بس صور أقدم للغة العرب، إنما كمان صور أقدم من ثقافتهم، بنحب نبكي على الأطلال من زمان! العلماء مش بس هيكتشفوا أبجديات مختلفة فيها خصائص العربية، وإنما، يا عزيزي، هيلاقوا صورة أقدم من الـ"فرانكو"، زي نقوش موجودة في شمال "الأردن"، مكتوبة بحروف يونانية، ولكنها بتتقال عربي، كأنك بتكتب عربي بحروف English. "(أبو حميد)، عندك!

أني فهمت انت عايز تقول إيه. أنا قفشتك! أنا فهمت دلوقتي إن فيه نقوش وأبجديات، ليها نفس الخصائص المميزة للغة العربية بس ظهرت قبل الخط والحروف اللي احنا بنستخدمهم.

السؤال بيقول هنا يا (أبو حميد)، اشمعنى بقى هي دي الحروف والرموز والخط اللي احنا بنستخدمه، مش النقوش التانية زي الحميرية مثلًا؟" حميرية؟! حميرية مين يا عم؟! اسمها الحِميَرية.

ليه العربي اللي وصلّنا واحد بالشكل اللي احنا عارفينه دلوقتي؟ مش متشتت لكل الخطوط دي؟ وإنما له شكل حروف واحد وخط واحد؟ ما أبجديات ربنا كتير! كدا، فيه حلقة مفقودة. في القرن الـ19، يا عزيزي، هيحصل اكتشاف لنقشين مهمين جدًا، هيغيّروا مسار التفكير تمامًا في شكل اللغة العربية قبل الإسلام، أول نقش هو نقش "فهرو"، نقش لقاه المستشرق الألماني "إينو ليتمان" في مدينة "أم الجُمال"، واللي كانت إحدى مراكز المملكة الأردنية النبطية القديمة.

ولأن العلم والاكتشافات، يا عزيزي، محتاجين شوية حظ، فالنقش دا، في الواقع، كان عبارة عن نقشين أو لوحتين، لوحة مكتوبة بلُغة غريبة، واللوحة التانية لم تكن إلا ترجمة للوحة اللي مكتوبة باللغة الغريبة دي، فاحنا ببساطة نستخدم اللغة اللي احنا عارفينها كـReference، عشان نترجم اللغة اللي احنا مش عارفينها. زي بالظبط اللي حصل في حَجَر "رشيد"، لغة واحدة بس تعرفها، تكشفلك باقي أسرار اللغات التانية، النقش دا، يا عزيزي، نقش اسمه "نقش النمارة" اللي بيعود لسنة 328 ميلادية، هتظهر فيهم كتابة شَبَه اللغة العربية بتاعتنا، مش زي النقوش القديمة الصعبة، دي، يا عزيزي، هي الكتابة النبطية، دي السر أو الحلقة المفقودة، بين النقوش الصعبة القديمة والعربي بتاعنا حاليًا، دا الوسيط. "طب يا (أبو حميد)، اشمعنى الكتابة النبطية دي هي اللي قربتلنا القديم؟" كل العرب اللي حكيتلك عنهم، يا عزيزي، طبيعي في القرون القديمة دي، كانوا بيتنقلوا، رُحّل، لكن الأنباط كانوا حضارة ومملكة مستقرة، امتدت من جنوب لشمال الجزيرة العربية لـ"الحِجر"، منطقة اسمها "الحِجر"، يا عزيزي، وكانوا بيتكلموا عربي، الفرق إن هما كانوا بيكتبوا معاملاتهم الإدارية للمملكة بالآرامي، كأنك مصري بس في شركة كل معاملاتها English، Dear Nabati, Hope This مخطوطة Find You!

عشان كدا، بوصولنا للقرن التاني الميلادي، كان سهل تلاقي Casually كدا شخص بيتكلم عربي، وبيكتب آرامي بخط نبطي. الرومان هيدمروا حضارة الأنباط، ولكن كالعادة، القلم هيبقى أقوى من السيف، الخط النبطي بتاعهم دا هينجو، وهيفضل موجود في شمال شبه الجزيرة، وهيفضل العرب يستخدموه. مع الوقت، الخط هيستمر، بس الآرامية هيبدأوا يهجروها، وهتبدأ تظهر الحروف العربية الحالية، تظهر بكلماتها وأشكالها.

وبحلول القرن الخامس والسادس الميلادي، هيكون عندنا خط عربي مكتمل التطور. يمكن العرب هيتوحدوا على الخط النبطي، لأنها لغة قدّمت نفسها باعتبارها لغة محايدة، لغة معاملات يومية وتجارية، مش لغة دينية خالص، أو خاصة بآلهة بعينها عند العرب، لغة ما لهاش تُقل ديني، فتخلّي ناس بتعبد إله تستخدمها، وناس بتعبد آلهة تانية ترفضها، الأبجديات اللي حكيتلك عنها دي اختفت بالتدريج ودا مش معناه إن العربي اللي كانت بتنطقه اختفى، كل ما في الأمر، إن احنا كان عندنا لغة واحدة بتتكتب بخطوط كتير، ودا، يا عزيزي، حصل على مدار التاريخ، إلا إن كان هناك ظرف تاريخي بعينه، خلّى هناك خط واحد بيتصدر للتعبير عن هذه اللغة، وكتب بهذا الخط معظم العرب، الخط دا هو الخط النبطي المتأخر. ولمّا ينزل الإسلام و"القرآن"، هيتوحد العرب كلهم على شكل اللغة والألفاظ اللي بنستخدمها لحد النهاردة.

في النهاية، يا عزيزي، مسألة الوصول للشكل الأقدم للعربي، لسة صعبة جدًا، لأن أغلب الباحثين حتى بعد مرحلة اكتشاف النقوش، بيجزموا إن هما ما يعرفوش عن طفولة اللغة العربية كل حاجة، وإن الطفولة دي بتخضع للاستنتاجات والتفسيرات. الجزيرة العربية، زي ما بقيت فاهم دلوقتي، كانت عبارة عن تشكيلة من الأبجديات والخطوط قبل الإسلام، لحد ما اتوحدنا على شكل الخط اللي بنستخدمه دلوقتي، ولأن كتير من أفكار الحلقة معتمدة على أحدث الاكتشافات من النقوش والآثار دي، فكتير برضه من دقة الإجابة على السؤال إيه هو أقدم شكل اتكتبت بيه العربية هيرتبط بالاكتشافات المقبلة، وهيفضل مفتوح قصاد فرضيات جديدة، ممكن تفتحلنا أبواب جديدة، المهم، يا عزيزي، نوسع تفكيرنا للغة العظيمة اللي اتطورت في آلاف السنين، ما نضيقش تفكيرنا، زي كتير من المستشرقين، اللي اعتبروا العرب قبل الإسلام صفحة بيضا، أشخاص أميين ومعزولين عن العالم، ما قدروش ينقلوا أي تراث مكتوب لأحفادهم. ودا لأن الأدلة الأثرية والنقوش اللي اتكلمنا عنها في أول الحلقة، بتبيّن مستوى عالي من التحضر لسكان بيسجلوا أدق تفاصيل حياتهم، من أول توسلهم للآلهة بتاعتهم لحد رحلة تخييم بين الأطلال.

ويمكن، يا عزيزي، النقطة بتاعة أقدم شكل للغة العربية كان عامل ازاي دي، مش مُلِحّة عندنا بشكل كبير كناطقين للغة العربية، لأن "القرآن الكريم" قِدِر ببساطة بلُغته وبلاغته، يكون نص تأسيسي للعربية الحالية، وعاء يحفظها، نص قدِر يثبّت شكل واحد للغة العربية، شكل يكون محفوظ ويستمر لأكتر من 14 قرن. دا، يا عزيزي، مش مرتبط بكون الشخص مسلم أو غير مسلم، "القرآن" حفظ شكل اللغة لحد دلوقتي لأي ناطق وقارئ وكاتب باللغة العربية، أما قبل "القرآن"، فاللغة كانت نص متشعب، سواء في نطقه أو في كتابته، نص متوزع على مساحة جغرافية واسعة جدًا، مساحة متنوعة القبائل والجماعات، اللغة العربية كانت نص له ألف لسان وألف طريقة كتابة، وألف جماعة من البشر، استخدموها للتعبير عن كل تفصيلة في حياتهم. وعلى أد دا، يا عزيزي، ما بيخلّي البحث متعب على أد ما بيخلّينا نقدّر تاريخ قديم سبقنا، ما كناش نتخيل إنه هيكون بالثراء دا، تاريخ قديم ما وصلّناش منه غير نقوش بسيطة، ولكن اتضح أنها ليست بهذه البساطة.

في النهاية، يا عزيزي، ما تنساش تشوف الحلقات اللي فاتت، تشوف الحلقات الجاية، تنزل تبص على المصادر، ولو احنا على الـ"يوتيوب"، نشترك على القناة. "(أبو حميد)، أنا عايز أكتب عربي، لو سمحت، بالأبجدية النبطية. " نبطية إيه؟!

أنا عارف، يا عزيزي، مشاكلك مع الحروف العربي. انت لسة لحد دلوقتي فاكر إن الألف عمود نور، والـ"ب" طبق تحتيه تفاحة، والـ"ت" طبق فوقيه تفاحتين، والـ"ث" تلاتة، والـ"ر" نازلة تشرب، والـ"ي" بطة. بطّل "نَبَط" بقى!